Në kuadër të një aksioni humanitar, Forca e Sigurisë së Kosovës (FSK) ka nisur aktivitetin vullnetar të dhurimit të gjakut në mbështetje të Qendrës Kombëtare të Transfuzionit të Gjakut.

Sipas njoftimit, aktiviteti po zhvillohet në ambientet e Ministrisë së Mbrojtjes dhe në njësitë e FSK-së, ku një numër i madh pjesëtarësh të forcës i janë përgjigjur thirrjes për të dhuruar gjak, me qëllim të ndihmës për qytetarët e Republikës së Kosovës dhe për mbështetjen e Qendrës Kombëtare të Transfuzionit të Gjakut.

“Aksionit vullnetar të dhurimit të gjakut i janë përgjigjur një numër i madh i dhuruesve të gjakut nga pjesëtarët e Forcës së Sigurisë së Kosovës, me qëllim që ti dalin në ndihmë Qendrës Kombëtare të Transfuzionit të Gjakut dhe gjithë qytetarëve të Republikës së Kosovës. Aksioni për dhurimin vullnetar të gjakut është organizuar në koordinim me Regjimentin e Mjekësisë së Forcës së Sigurisë së Kosovës dhe Qendrës Kombëtare të Kosovës për Transfuzion të Gjakut( QKKTGJ) dhe sipas planit do të vazhdojë në të gjitha kazermat e Forcës së Sigurisë së Kosovës”, thuhet në njoftim./Arbresh.info